திறவுகோல்

நினைப்பது வேறாய் நடக்கிறது- இறை

நியதி அதில்தான் இருக்கிறது

நெஞ்சில் எதையோ நினைக்கின்றேன் – நான்

நினைப்பது வேறாய் நடக்கிறது

நினைப்பது வேறாய் நடந்தாலும் – சற்று

நிம்மதி அதிலும் தெரிகிறது – இறை

நியதி எனக்குப் புரிகிறது

பஞ்சின் மென்மை உணர்கின்றேன் – அது

படிந்து முறுகித் திரிகிறது

படிந்து முறுகித் திரிந்தாலும் – ஒளி

பரிந்து திரியில் விரிகிறது – அதன்

பயணம் நமக்குப் புரிகிறது

வெயிலில் ஒளியைக் காணுகிறேன் –அது

வெம்மை பெற்றுத் தகிக்கிறது.

வெம்மை பெற்றுத் தகித்தாலும்-புவி

வேகம் அதுதான் கொடுக்கிறது- உயிர்

வித்தை எங்கும் கொடுக்கிறது

பயிலும் சொல்லைப் பெய்கின்றேன் –அது

பாரம் சுமக்க மறுக்கிறது

பாரம் சுமக்க மறுத்தாலும்- ஒரு

பாதி அதுதான் சுமக்கிறது- கவிப்

பாதை அங்கே திறக்கிறது

இலந்தை